2020-10-28
近來實境遊戲誠搶市,臺南社區大學最近以信義街做背景,設計一套實境遊戲,這个遊戲結合老街的歷史傳說佮在地特色店頭,提一支手機仔佮地圖,就會使那耍解謎過關那踅老街。
提手機仔掃QR code,共地圖佮家私紮咧,就會使開始耍實境遊戲,比對地圖,逐家揣著第一關的所在,佇巷仔內的代天府,原來大門聯對,就是謎猜,一字一字揣出英文,才會當到第二關。
第二關的謎猜就藏佇這个拗好的八卦圖內底。
這个實境遊戲是講一个少年欲揣阿媽的故事,耍的人愛佇這條信義街解謎、過關,嘛會佮貓妖大戰,因為遮古早有貓妖傳說,逐家那耍那踅街。
台南社區大學設計這个實境遊戲,目前閣是試驗階段,拍算11月上市,部份關卡就佇在地店頭,希望民眾透過遊戲,了解地方文化,嘛開喙講台語。
台南社大希望,民眾來老街毋但去咖啡廳抑是餐廳交關,用一支手機仔,就會當用無仝的方式認捌老街文化。