共台南社大拍噗仔鄭光南 2020.3.15

楊麗卿老師這學期佇台南社區大學開一門課「按怎寫好聽閣袂跳針的台語文」，欲開課進前，阮看伊足緊張，伊驚:家己知名度無夠學生會不識貨，驚家己教了無好，辜負學生，嘛看伊四界去請教愛按怎教較會較端的……均屬逐項驚，結果，有一項伊無驚著，就是武漢肺炎會予學生不敢來報名。

2020.03.03開始頭一堂課，抵著武漢肺炎佇全世界咧大流行，國內外人人自危。阮做學生的嘛足驚敢會受這粒冠狀病毒的影響，這個班suà開袂成?

上課彼工，我機車騎到後甲國中的後門，就看著兩位社大的工作人員徛踮入口，招呼我共車停落來，一位量我的額溫閣共我講入去教室要填額溫幾度;一位共我報上課的教室佇103。哇!恭喜噢，楊老師，妳的新班開有成囉，按呢伊頂學期煩惱知名度無夠，驚報名的學生傷少，班開袂成，suà是加兮。

入去教室，10捅个人。有的還未來的款?老師的自我紹介，一再提起，伊這個班開會成，要感謝社大校方的支持。因為報名的同學才8位，學分費一個人1000箍，18小時的課，老師的鐘點費/社大軟硬體的使用費，佮行政費用，根本就是倒貼錢來開這個班。真正是要共社大呵咾，聽講現此時的社會，有人去菜市仔買物，頭家嫌伊無講台灣話，袂爽，就不賣伊。按呢頭家人傷囂掰[hiau-pai]矣，生理人不是生理愈交易愈好，苦無人客來共交關，竟然有錢不癮趁，講起來較無合情理。

不過對這個事件看起來，社大甘願了錢開台語班，乎較濟人學講台語，嘛是對促進島內族群和諧有做出實質的貢獻。開台語文的班，想嘛知影是較冷門的課程，若照規定的開班人數，我看逐班嘛開袂成，台南社大竟然負起這個母語教育的歷史責任，不惜成本來開班，真正足感心兮，伊不是華語講的「死要錢」，誠實要共伊說多謝講擼力。

閣看這擺武漢肺炎防疫[i̍k]工作，社大嘛是做了誠好，會使講做會到兮攏做矣。教室裡，有囥一罐消毒桌、椅、門窗的低濃度漂白液，佮一罐酒精通來消毒手。佇學員關懷方面，嘛有一張表格予老師、同學填寫額溫，閣要求以班為單位，佇line頂面成立一個群組，同學袂當來上課，要佇line請假，若有發燒無爽快，攏袂使隱瞞病情，目的就是欲共同來防堵武漢肺炎的擴散。

課上到一半，社大的「衛教」老師佮志工女士入來教室矣。「衛教」老師，媠媠的面乎喙罨[tshuì-am]遮咧，不過伊口齒清晰[sek]，表達清楚，含我這種老歲仔to聽有。伊第先講咱台灣的醫療水準，佇這擺全球冠狀病毒防疫的表現是世界一粒一兮，時中部長防疫指揮若定[tsí-huijio̍k-tīng]嘛是一等一兮，咱絕部分的老百姓嘛真有水準，誠配合政府的防疫政策。

「衛教」老師講咱社大是教育機構，頂面是教育局，閣頂面是教育部，若咱國內會當對上到下，層層把關，逐个人攏會當kā防疫做乎好，莫烏白聽假消息，按呢就啥物攏毋免驚。閣交代上課的時窗仔門要拍開，欲拍開窗仔門的前後，手要用酒精消毒等等實務的細節……了後志工女士閣一再吩咐佗位要注!意，真正會當聽出伊奉事志工的熱情佮慈悲。

受著台南社大遮呢濟的照顧，心存感激，不過，我干焦會當偷偷仔講擼力，只向望楊老師繼續教按怎寫優雅通順的台文，社大嘛「幫幫忙」會當有part2，part3……落去，多謝!擼力!