2020-09-30 18:54 最後更新：2020-09-30 19:12
 

佇臺南的正興街，舊年有民眾發起揣台語的活動，今年繼續邀請信義街的廟寺佮店家，成立「台語招呼店」，每一个店家錄一句台語，記錄佇QR code，這個活動也用台語共街頭巷尾的特色揣倒轉來。

來到台南信義街這間茶桌仔，愛會記得用台語點你欲啉的茶喔。

原來會曉講一句台語，店頭家會送你一項伴手，這毋是普通的拊仔，用手機仔掃QR code，隨會當聽著一段錄音。

有送拊仔予民眾的店家，攏是信義街的台語招呼店，這是金曲歌王謝銘祐佮地方社團同齊發起的揣台語活動。

謝銘祐in舊年代先佇正興街發起【來台南揣台語】，希望逐家自然講台語，嘛用台語來認捌台南府城的文化，今年信義街閣有12間店家加入，號名叫做台語招呼店，in會用台語提供問路、招待的服務。

每一間店家的拊仔，攏有一句無仝的台語，台語拊仔變做旅遊紀念品，民眾會當聽故事學台語，自然用台語佮頭家開講，感受台南人的熱情。